Пратеничката од СДСМ, Сања Лукаревска, на денешната седница постави пратеничко прашање до заменик-министерот за здравство Јовица Андовски, во врска со хаосот во здравствениот систем. Лукаревска укажа на сериозните проблеми во здравството, меѓу кои недостиг на медицински кадар, незадоволство кај пациентите и вработените, лоши услови во здравствените установи и бројни скандали кои го нарушуваат функционирањето на системот. Лукаревска посочи дека околу 50 вработени на Клиниката за детски болести шест месеци не земаат плата, поради што протестираа пред Министерството за здравство. Таа побара одговор како Министерството ќе го реши овој проблем и кој ќе ја понесе одговорноста за состојбата што директно влијае врз здравјето на децата со имунолошка терапија.
Во продолжение е интегралното пратеничко прашање на Лукаревска:
„Второто прашање ми е до заменик-министерот за здравство. Жалам што не е тука министерот за здравство, бидејќи деновиве вашиот ресор е доста актуелен. Имаме проблеми, застој, незадоволство на секој чекор, недостиг на медицински кадар, спратови од клиники кои долго се реновираат, несоодветни услови во клиниките, револтирани пациенти кои што се во животозагрозувачка состојба поради несоодветен третман, вработени во клиниките евидентирани за присуство на работно место од страна на еден колега, а другите си ги терале приватните обврски. Одземена надлежност на Стоматолошката комора за издавање на лиценци. Сè уште нема епилог за овој случај. Многу тужби за неисплатени ноќни смени, дежурства и прекувремена работа.
Исто така загрижува состојбата дека многу доктори од јавното здравство вршат дополнителна работа и на приватните клиники. Немате стратегија како да се справите со тоа. Да го споменам и скандалот со нелегален ботокс и филери. Лош ревизорски извештај за скрининг-програмите итн. и круна на сè ова, признание е најновиот Индекс за здравствена заштита на Намбео (Numbeo) за 2026 година, на кој сме на листата на најлоши здравствени системи во светот, значи лоши оценки за квалитетот на медицинските услуги, персоналот, болничката инфраструктура, времетраењето на чекање и трошоците за лекување.
Деновиве во фокус е Клиниката за детски болести, а во врска со медицинскиот кадар околу 50 вработени од истата клиника протестираа пред Министерството за здравство незадоволни што веќе шест месеци не земаат плата. Бараа средба со министерот Алиу, не знаеме, немаме информација дали таа средба е реализирана, бројни реакции до надлежни институции и ветувања дека ќе се направат напори за решавање на проблемот. Нивниот статус останува нерешен. Со ваква поставеност го видовме нивниот револт од фактот што добиле дури утешна награда дека всушност тие се на некој начин и волонтери. Нивниот ангажман е волонтерски. Зошто дозволивте ваков развој на настаните? Најголемиот проблем тука е што е загрозен животот на дечињата. Ним им е потребна редовна контрола, терапија, соодветна грижа. Ним не им помагаат ниту прес-конференциите, ниту пак префрлањето на топката од една во друга институција и кој е одговорен за ваквиот развој на настаните.
Долго време се повикувате на административни пречки, а замислете во владината програма за четиригодишниот мандат стои вака – „Визијата на Владата е ефикасен, ефективен и достапен здравствен систем за граѓаните на Македонија. Нашата визија го поставува пациентот во центарот на сите здравствени процеси“. Владата дека ќе изработи план за оптимизација за здравствениот систем, вложување во јавното здравство и така натаму. Ова не е ништо точно бидејќи реалноста е сосема друга.
Ве прашувам како ќе го решите овој проблем во Клиниката за детски болести“.