Министерството за земјоделство, шумарство и водостопанство денеска информираше дека се реализирани средства во износ од 481.127.667 денари на сметките на 12.458 лозари. Исплатата доаѓа токму во пресрет на празникот Св. Трифун, заштитникот на лозарството.
Средствата се наменети за Мерката 1.8, односно за директни плаќања по обработлива површина за одржување на постојните лозови насади. Од Министерството истакнуваат дека со оваа навремена исплата се потврдува посветеноста на институциите кон поддршка на оваа стратешка земјоделска гранка.
„Продолжуваме со реализација на мерки и политики насочени кон одржливост и унапредување на земјоделското производство“, се вели во соопштението на МЗШВ.