Германскиот авиопревозник Lufthansa донесе одлука трајно да ги повлече летовите меѓу Франкфурт и Скопје. Иако првично беше најавено дека рутата само ќе биде паузирана во текот на јуни, компанијата сега ги отстрани сите летови од продажба за остатокот од летната сезона, како и за претстојната зимска сезона која започнува на 25 октомври.
Оваа линија, која беше воведена во април 2023 година, првично оперираше со висока фреквенција од десет летови неделно. Сепак, веќе во текот на изминатата зима беа забележани значителни кратења на само три неделни летови, што го навести повлекувањето на германскиот гигант од македонскиот пазар.
Со укинувањето на оваа директна врска, патниците кои патуваат кон Скопје ќе бидат пренасочувани кон алтернативни рути. Според официјалниот распоред на Lufthansa Group за 2026 година, понудата сега се потпира на летови преку Виена со Austrian Airlines.