На седница на Уставниот суд беше разгледувана иницијативата поднесена од Левица за оценување на уставноста на одредбите од Изборниот законик, за кои партијата тврди дека ѝ го ограничуваат правото за време на изборна кампања да се рекламира на телевизии, радија, интернет-портали и билборди.
Од Левица информираат дека поради недоволен број гласови не била донесена одлука, а предметот останува отворен.
„Расправата ја откри неспорната вистина за која и дел од уставните судии се согласија – дека постои нееднаков третман и дискриминација врз Левица“, наведуваат од партијата.
Од Левица посочуваат дека дел од судиите укажале оти политичкиот плурализам не може да постои без еднакви услови за политички натпревар.
„Нееднаквиот третман не завршува со ограничување на медиумскиот простор, туку директно влијае врз самиот изборен резултат. Изборниот исход не може да се смета за објективен ако уште во првата фаза од изборниот процес еден учесник е ставен во нерамноправна положба“, стои во соопштението.
Од партијата велат дека било посочено и дека фактот што за ова прашање се одлучувало во 2023 година не значи дека тогашната одлука треба автоматски да се повтори, бидејќи постојат нови околности.
„Еднаквоста мора да постои во целиот изборен процес, а не само на денот на гласањето“, наведуваат од Левица.
Во соопштението партијата упатува критики кон дел од уставните судии кои, според нив, останале на ставот од претходната одлука.
„Наместо да ја преиспитаат претходната позиција во светло на новите факти, тие избраа да ја бранат сопствената непогрешливост“, велат од Левица.
Од партијата додаваат дека Уставниот суд треба да ја оценува усогласеноста на законите со Уставот, а не политичките последици од своите одлуки.
„Уставниот суд не смее да биде институција што ја конзервира неправдата“, порачаа од Левица.