Министерот за здравство, Азир Алиу, најави радикална промена во начинот на кој здравствениот систем ќе се справува со жртвите на насилство. Во иднина, лекарите ќе имаат обврска и можност да евидентираат случаи на насилство во системот, дури и кога пациентите самите одбиваат или не го пријавуваат истото.
Оваа мерка, како што појасни Алиу на седница на собраниската Комисија за еднакви можности, е клучна за навремено препознавање на „обрасци“ на насилство.
„Ако некој доаѓа со исти повреди по одреден период, системот ќе овозможи да се реагира и од здравствен, психолошки и правен аспект“, истакна Алиу.
Што сè ќе биде опфатено со новите мерки?
- Национален регистар: Ќе се воспостави база на податоци за прецизно следење на состојбите.
- Поврзување со „Е-здравство“: Центрите за поддршка ќе бидат дигитално поврзани за брза размена на информации.
- „One stop“ центри: Во болниците ќе се отворат специјализирани центри каде жртвата на едно место ќе добие медицинска, психолошка и правна помош.
Целта на Министерството е изградба на систем кој не само што ќе реагира по инцидентот, туку и активно ќе превенира повторување на насилството, градејќи поголема доверба кај жртвите кон институциите.