Членот на Извршниот комитет и пратеник на ВМРО-ДПМНЕ, Миле Лефков, денеска на прес-конференција упати остри критики до лидерот на СДСМ, Венко Филипче, обвинувајќи го за пасивност во однос на последните дипломатски случувања со Бугарија.
Според Лефков, опозицискиот лидер свесно избегнува да упати критика кон официјална Софија по објавувањето на документ со чувствителни безбедносни информации за премиерот Христијан Мицкоски и неговото семејство.
Во своето обраќање пред медиумите, пратеникот Лефков истакна:
„Венко Филипче повторно покажа дека кога треба да избере помеѓу македонската или антимакедонската политика, тој секогаш ја избира антимакедонската. Филипче не најде за потребно да упати ниту најмала критика кон официјална Софија, иако Бугарија направи дипломатски преседан со објавување документ што содржи чувствителни информации поврзани со безбедноста на претседателот Мицкоски и неговото семејство.“
Од владејачката партија реагираат дека ваквото однесување претставува прекршување на основните дипломатски правила од страна на бугарските власти, за што опозицијата моментно молчи.
Дополнително, Лефков додаде дека СДСМ редовно ги оправдува туѓите позиции на штета на домашните интереси:
„За човек кој секојдневно зборува за европски вредности, денес нема ниту збор за прекршувањето на основните дипломатски правила. Кога треба да се критикуваат бугарските власти, Филипче исчезнува од јавноста. Тоа е истиот Филипче кој никогаш не реагира кога од страна на Бугарија се негираат македонскиот идентитет, јазик и историја. Истиот Филипче кој секогаш наоѓа оправдување за бугарските позиции, но никогаш аргумент во одбрана на македонските интереси. Со ваквото однесување Филипче испраќа порака дека е подготвен да премолчи се што доаѓа од Софија, па дури и да имплементира нивни срамни барања.“