Пратеникот и член на ИК на ВМРО-ДПМНЕ, Миле Лефков, на денешната прес-конференција упати обвинувања до обвинителот Ислам Абази дека го заштитил поранешниот министер за здравство Венко Филипче од одговорност за пожарот во модуларната болница во Тетово.
Според Лефков, предметот и доказите со години се чувале во фиоките на обвинителките Вилма Русковска и Елизабета Јосифовска, со што, како што рече, Абази директно му овозможил заштита на Филипче.
Тој посочи дека поранешниот економски директор на тетовската болница, Артан Етеми, до последен момент одбивал да ја прими и да ја пушти во употреба модуларната болница, бидејќи објектите биле набавени како стоки и не можеле да се користат за здравствена дејност.
„Вистинскиот виновник не седи до нас, а тоа е Филипче, вака рекоа обвинетите за пожарот во модуларната болница, инаку поранешни директори на тетовската болница, зошто Абази ова го премолчи?“, праша Лефков на прес-конференцијата.
Пратеникот додаде дека Светска банка барала одобренија за поставување и употреба, како и извод од Катастар за да се покаже одржливост на проектот, но одобренија не можеле да издадат ниту Општината ниту Министерството за транспорт и врски поради непочитување на Законот за градење. Поради липса на извештај од надзор, согласно член 74 од Законот за градење, и Катастарот одбивал упис.
И покрај сите противречења од директорите на болниците низ земјава, објектите биле пуштени во употреба по одлука на Министерството за здравство и тогашниот министер.
Од партијата бараат одговори од ОЈО ГОКК зошто биле премолчени тврдењата на обвинетите и зошто не била побарана одговорност од Филипче за објект кој во моментот на несреќата немал одобрение за поставување ниту за употреба.