Венко Филипче и раководството на СДС, ширејќи, како што велат од ВМРО-ДПМНЕ, „лаги и хистерија“ во јавноста за изградбата на дата центрите, се ставиле на иста линија со Кина, а против САД, кои се стратешки партнер на Македонија.
Ова го истакна Миле Лефков, член на Извршниот комитет и пратеник на ВМРО-ДПМНЕ, на денешната прес-конференција.
Од партијата посочуваат дека и во САД постојат обиди за креирање негативно јавно мислење против изградбата на дата центри. Според нив, американски медиуми известувале дека дел од содржините против оваа индустрија организирано се шират преку профили поврзани со Кина.
„И овие профили на социјалните мрежи организирани од Кина се на иста линија со Филипче или Филипче е на иста линија со нив“, рече Лефков.
Од ВМРО-ДПМНЕ велат дека ставот на Кина е разбирлив, бидејќи САД со развојот на дата центрите се голем конкурент, но дека не го разбираат ставот на Филипче.
„Покрај наводната грижа која Филипче ја изразува од евентуално зголемено трошење електрична енергија и штетно влијание на водите во државата, тој вчера посочи дека граѓаните нема да видат никаква добивка од дата центрите“, истакна Лефков.
Од ВМРО-ДПМНЕ прашуваат дали Филипче смета дека граѓаните немаат корист од развојот на напредна индустрија и дали национален дата центар, во кој би се чувале податоци на граѓаните и државата, не претставува придобивка.
„Филипче и СДС покажуваат само едно – грижа за сопствени интереси, но не и интереси за подобар живот на граѓаните“, стои во реакцијата.