Либерално-демократската партија (ЛДП) изразува целосна поддршка за онколошките пациенти кои утре ќе протестираат пред Министерството за здравство. Трагично е што луѓе кои водат најтешка битка за сопствениот живот повторно се принудени наместо во болница, да бараат правда на улица, се вели во соопштението од ЛДП.
-ЛДП уште минатата година предупреди дека недостигот на онколошка терапија не е изолиран инцидент, туку сериозен системски проблем и побара одговорност од Министерството за здравство. Наместо решение, денес гледаме повторување на истиот срам. За секој ден без терапија некој мора да одговара. Не може секојпат кога ќе се испразнат залихите виновник да нема, а последиците секогаш да ги трпат пациентите, велат од ЛДП и упатуваат барања:
ЛДП бара:
– Итно обезбедување на целата неопходна терапија;
– Целосна јавна информација за причините за недостигот;
– Утврдување лична и политичка одговорност за институционалниот пропуст;
– План со кој ќе се гарантира дека ова никогаш повеќе нема да се повтори.
-Држава која што не може да обезбеди лекови за најтешко болните нема право да зборува за успеси во здравството. За онколошките пациенти нема втор обид. Секој изгубен ден може да чини човечки живот, велат од партијата.