Рускиот министер за надворешни работи Сергеј Лавров денеска ги обвини европските поддржувачи на Украина дека вршат притисок врз САД за безбедносни гаранции како дел од тековните дискусии за ставање крај на војната.
Повикувајќи се на извештаи за разговори меѓу европски и американски претставници, Лавров рече дека Европејците се обидуваат да го принудат Вашингтон да обезбеди безбедносни гаранции за Украина, игнорирајќи ги безбедносните интереси на Русија, пренесе ДПА.
Претставници на Украина во моментов водат разговори со американски и европски делегации за евентуално решавање на речиси четиригодишната војна на Русија.
Клучно прашање е пакетот безбедносни гаранции што САД и другите би ѝ ги понудиле на Украина во случај на мировен договор.
Од ноември, кога американскиот предлог во кој е наведена потенцијална рамка за ставање крај на војната стана јавен, се одржаа неколку рунди дискусии меѓу Вашингтон, Киев и европските партнери, со различни амандмани и контрапредлози.
Критичарите го опишаа почетниот план на САД како „список на желби за Русија“.
Според украинскиот новински медиум РБЦ Украина, Киев го испратил својот официјален одговор до Вашингтон доцна синоќа.
Планирани се дополнителни разговори со европските поддржувачи, изјави украинскиот претседател Володимир Зеленски.