Портпаролката и членка на Извршниот одбор на СДСМ, Богданка Кузеска, на денешната прес-конференција упати серија обвинувања по повод две години од доаѓањето на Христијан Мицкоски и неговата коалиција на власт.
Од опозициската партија обвинуваат дека во овој период граѓаните не виделе реализација на ветените проекти, туку се соочуваат со уназадување на стандардот.
„Две години во кои граѓаните наместо резултати добија лаги, дефокус и закани. Наместо подобар животен стандард, добија економски колапс, најниски плати во Европа и раст на сиромаштијата на 22%“, изјави Кузеска.
Според СДСМ, економските индикатори покажуваат сериозен пад на перформансите, а државниот долг е енормно зголемен за краток временски период.
„За само две години Владата на Мицкоски ја задолжи државата со 2,5 милијарди евра нов долг. Задолжувањето е секојдневно. Буџетот е празен“, додаде Кузеска, нагласувајќи дека има кратења кај земјоделските субвенции за 40 милиони евра и сериозен ризик за исплата на идните пензии.
Опозицијата тврди дека од вкупно 1.198 ветувања наведени во изборната програма на владејачката партија, досега не е исполнето ниту едно.
Таа додаде дека на прашањата за економијата и корупцијата, премиерот Мицкоски одговара со навреди, при што оние кои бараат европска иднина ги нарекува „талог на општеството“, „мочуриште“, „мекотели“, „глодари“ и „медиокритети“.
„Со лаги дојде на власт, со лаги владее, со лаги се обидува да се задржи на власт. Ова е резимето на две години од владеењето на Христијан Мицкоски и неговата организирана криминална група – ВМРО, во тендер-коалиција со распаднатиот ЗНАМ“, заклучи Кузеска.