Портпаролката на СДСМ, Богданка Кузеска, денеска упати јавен повик до Јавното обвинителство веднаш да отвори истрага за унгарскиот кредит, по најавите на новиот унгарски премиер Петер Маѓар за ревизија на меѓународните договори.
Според СДСМ, политичките промени во Унгарија директно ќе влијаат врз разоткривањето на бизнис релациите во Македонија.
„Со падот на пријателот на Мицкоски и негов заштитник, Виктор Орбан, започнува разоткривањето на бизнис мрежата која ќе ја видат и граѓаните на Македонија“, изјави Кузеска.
Таа посочи дека „Блумберг“ веќе објавил детали за заем од една милијарда евра кој владата на Орбан го земала од кинески банки во 2024 година, истата година кога македонската Влада се задолжи кај Унгарија за идентична сума.
Од СДСМ тврдат дека во Македонија, исто како и во Унгарија, се криеле камати и провизии.
„Имаше скриени трошоци кои владата никогаш не ги соопшти. Над 1 милион евра беа префрлени за договорни услуги, но никогаш не се дозна дали се за банкарски провизии или за консултантски услуги. И се уште не се знае каде завршија овие пари“, нагласи Кузеска.
Партијата смета дека се пресликуваат истите методи на корупција и тајни бизниси, поради што инсистираат на итна правна разврска.