Премиерот Христијан Мицкоски ја изманипулира јавноста кога тврдеше дека прославата за Денот на независноста чинела „0 денари“, реагираа денеска од опозициската СДСМ.
На прес-конференција, портпаролката на партијата Богданка Кузеска изјави дека портпаролката на Владата потврдила оти за прославата се потрошени над 5 милиони евра преку АД Државна Лотарија.
„Уште еднаш се потврди, арамијата Мицкоски штом отвори уста – ги лаже граѓаните. Дури и неговата портпаролка на Владата го демантираше на прес конференција. Тоа вчера сите го видоа. Не се „0 денари“ како што лажеше Мицкоски, за прославата на независноста потрошени се над 5 милиони евра, народни пари. Се потврди се она што претседателот Филипче и СДСМ го говорат од самиот почеток“, истакна Кузеска.
Таа побара Мицкоски веднаш да ги соопшти сите детали за доделените средства и критериумите според кои се избирале компаниите.
„Преку АД Државна Лотарија, која е 100% државна компанија, над 5 милиони евра се потрошени а никој не знае каде и за што. Откако призна дека не се „0 денари“ туку над 5 милиони евра, Мицкоски сега треба да излезе и јавно да објави каде завршија парите на граѓаните. Кои компании добиле милиони евра народни пари, врз основа на кои критериуми?“, изјави Кузеска.
Според СДСМ, дополнително спорни се составот на тричлената комисија во Лотарија и исплатите кон поврзани компании.
„Како била избрана Комисијата од 3 члена во АД Лотарија која требала да одлучува за избор на фирма за прославата? Особено што претседателот таа комисија се јавува и како автор на оркестрациите и аранжманите на концертот. Врз основа на кои критериуми се договарани фирми – ќерки да добијат милиони евра народни пари преку Државна лотарија? Колку милиони евра се потрошени за провизии и проценти?“, додаде портпаролката на СДСМ.
Кузеска го оцени случајот како проневера на јавни средства и побара комплетен отчет.
„Ова е една голема проневера на пари, арамиски концепт на владеење на Мицкоски и неговата Организирана криминална група. Се лажат граѓаните дека чинело „0 денари“, се кријат информации, се манипулира додека милионски суми завршиле во нечии џебови. Мицкоски веднаш да ги објави сите исплати, граѓаните коишто платија 5 милиони евра нивни пари да знаат кој, колку пари добил и за што“, рече таа.