Портпаролката на СДСМ, Богданка Кузеска, на денешната прес-конференција обвини дека матрицата на дејствување на Никола Груевски и Христијан Мицкоски е идентична, нагласувајќи дека криминалот мора да биде изведен пред лицето на правдата.
Според СДСМ, огласувањето на Груевски од Унгарија и неговите насоки кон институциите се поклопуваат со начинот на кој Мицкоски настапува од собраниската говорница.
„Никола Груевски, осудениот криминалец во бегство, повторно се огласува од Унгарија и директно „наредува“ на институциите и обвинителствата што треба да се истражува. Исто како што Мицкоски „наредува“ од собраниската говорница и од телевизија“, изјави Кузеска.
Од партијата тврдат дека актуелната власт врши целосна партизација на судството и полицијата, воспоставувајќи контрола над независните институции. Кузеска посочи дека корупцијата и уништувањето на институциите скапо ја чинат државата и нејзината иднина.
Во однос на министерот за правда од редовите на ЗНАМ, од СДСМ сметаат дека неговото поставување е стратешки потег на коалицијата за да се избегне директна одговорност на ВМРО-ДПМНЕ во случаите поврзани со Груевски.
„Македонија мора повторно да стане слободна земја, без криминал и корупција за да може да продолжи по европскиот пат. СДСМ еднаш веќе ја ослободи Македонија од оваа криминална група. И повторно ќе го стори тоа“, порача портпаролката на СДСМ.