Портпаролката на СДСМ, Богданка Кузеска, на денешната прес-конференција упати остри критики кон економските политики на Владата, оценувајќи дека тврдењата за Македонија како „трета економија во Европа“ се апсурдни и немаат допирна точка со реалноста на граѓаните.
„Со празни фрижидери и празни џебови, граѓаните најдобро знаат за бајките на Мицкоски. Народот плати за грешките на власта, а цената допрва ќе расте“, изјави Кузеска. Според неа, стандардот на граѓаните е сериозно загрозен од растот на цените, додека платите стагнираат.
СДСМ обвини дека инвестициите се во пад за над 60 %, а во изминатите неколку месеци се отпуштени над 1.500 работници. Портпаролката ја прозва власта и за невраќање на ДДВ кон стопанството во висина од 180 милиони евра, обвинувајќи ја за фокусираност кон приватни интереси наместо кон економијата.
Од опозициската партија порачаа дека е време да престанат „бајките“ и да се преземат итни мерки, притоа повторувајќи ги своите барања за замрзнување на цените и намалување на даноците за основните продукти.