Одделот за внатрешна контрола, криминалистички истраги и професионални стандарди при Министерството за внатрешни работи поднесе кривична пријава против полициски службеник од СВР Тетово поради сомнение за фалсификување службена исправа.
Како што информираат од МВР, станува збор за лицето Д.М., кое се товари за кривично дело по член 361 од Кривичниот законик. Според наводите, пријавениот во јуни 2019 година, постапувајќи по барање од адвокат од Тетово, изготвил службен документ за достапност на лице со невистинита содржина, без да изврши соодветни проверки на терен.
Понатаму, за да го озваничи документот, тој го злоупотребил потписот на раководителот, внел несоодветен деловоднички број и го заверил со службен печат. Документот потоа бил предаден директно на адвокатот, спротивно на пропишаните процедури за канцелариско и архивско работење.
Според информациите, ваквиот службен спис бил употребен како доказ во судска постапка пред Основниот суд во Тетово, при што бил евидентиран на штета на лице од Тетово.
Кривичната пријава е поднесена до надлежното Основно јавно обвинителство за гонење организиран криминал и корупција, а се преземаат понатамошни мерки за расчистување на случајот.