Рускиот претседател Владимир Путин е подготвен да се сретне со американскиот претседател Доналд Трамп, но засега не е утврден конкретен датум за таква средба, изјави портпаролот на Кремљ, Дмитриј Песков.
Изјавата следува откако Трамп посочи дека е можна средба со Путин, но оцени дека е малку веројатно таа да се одржи за време на самитот на Г-20, кој е закажан за 14 и 15 декември во Мајами.
Американскиот државен секретар Марко Рубио потврди дека САД испратиле покана до рускиот претседател за учество на самитот на Г-20. По разговорите со рускиот министер за надворешни работи Сергеј Лавров, Рубио изјави дека двете страни покажале интерес за ограничено примирје поврзано со испораките на жито и енергетските ресурси.
Според него, Вашингтон е подготвен да одигра конструктивна улога во постигнувањето на таков договор, кој би можел да претставува почетна точка за пошироко мировно решение.
Во меѓувреме, како можна локација за средба меѓу Трамп и Путин се споменува и самитот на Азиско-пацифичката економска соработка (АТЕС), што ќе се одржи на 18 и 19 ноември во Шенжен, Кина. Се очекува Путин да ја посети Кина во тој период, а постојат дипломатски сигнали дека и Трамп би можел да присуствува на форумот.
Според информациите, кинескиот претседател Си Џинпинг се залага за присуство на американскиот лидер на самитот во Шенжен, додека Пекинг предложил и самиот Си да учествува на самитот на Г-20 во Мајами.
Во однос на можна средба меѓу Путин и украинскиот претседател Володимир Зеленски, Песков изјави дека такво нешто во моментов не е на повидок. Тој повтори дека руската страна останува на претходно изнесените услови и оцени дека средба без претходна подготовка не би имала резултат.