Кралот Чарлс во тридневна посета на Германија, првиот британски монарх што ќе се обрати во Бундестагот

Кралот Чарлс и сопругата кралицата Камила денеска ќе ја посетат Германија, што е прва официјална посета на новиот британски крал.

Тој требаше да го посети Париз пред Берлин, но тоа беше одложено поради протестите што се одржуваат во Франција.

Целта на тридневната посета на Германија е да се покаже дека Европа е дипломатски приоритет за Обединетото Кралство, пишува Би-Би-Си.

„Постои очигледна причина за посетата – да се подобрат односите по брегзит“, вели водечкиот уставен експерт и историчар сер Вернон Богданор.

Се вели дека ова е прва државна посета на британски монарх во последните осум години и ќе го зајакне она што Бакингемската палата го нарече „заедничка историја, култура и вредности“.

Посетата уследи по средбата меѓу кралот и претседателката на Европската комисија Урсула фон дер Лајен, кога беше објавен договорот за брегзит со Северна Ирска.

По крунисувањето на кралицата Елизабета Втора во 1953 година, нејзиното прво патување беше турнеја низ земјите на Комонвелтот. За кралот Чарлс, 70 години подоцна, градењето мостови со европските сојузници е приоритет, особено за време на конфликтот во Украина.

Кралскиот експерт, професорот Полин Мекларен смета дека тоа што првично беше планирано како двојно патување во Франција и Германија е сигнал дека важноста на која било земја за Велика Британија не е доведена во прашање, односно дека се работи за реалполитика како и за зближување.

Во исто време, кралот Чарлс ќе стане првиот британски монарх кој ќе се обрати пред германскиот парламент, Бундестагот.

Планирано е и кралската двојка да положи венци на споменикот на Свети Никола во Хамбург, кој беше оштетен од бомбардирањето на сојузниците за време на војната.

Свечениот пречек со воени почести ќе се одржи на Бранденбуршката порта, додека државната манифестација ќе се одржи во палатата Белви на германскиот претседател.