На денешната 140-та редовна седница, Владата го усвои Предлог-законот за јавно обвинителство, кој се најавува како клучен дел од реформската агенда за владеење на правото. Со ова решение, државата цели кон зајакнување на независноста и ефикасноста на обвинителскиот систем.
Главната новина во законот е промената на постапката за избор на Јавен обвинител на РСМ. Се воведуваат јасно дефинирани критериуми и мерит-систем, со цел процесот да биде ослободен од политички притисоци.
„Во законот се вградени релевантните препораки, со цел процесот да биде ослободен од политички влијанија и заснован исклучиво на стручност, интегритет и професионален кредибилитет“, велат од Владата.
Дополнително, се воведуваат и прецизни рокови за унапредување на обвинителите, како и нов принцип за дисциплинска одговорност, што треба да донесе поголема предвидливост и отчетност во работата.