Со денешната работна сесија на Советот на амбасадори, на која ќе се обрати претседателот на Собранието, Африм Гаши, пратениците и официјално се враќаат со собраниски активности по летната пауза. Првата нова пленарна седница е закажана за 2 септември.
Според информациите објавени на веб-страницата на Собранието, на 25 август се најавени и две средби на Гаши – со турскиот амбасадор Фатих Улусој и со постојаната координаторка на ОН, Рита Колумбиа. Од Кабинетот на Гаши посочуваат дека претседателот на Собранието континуирано ги извршува работните обврски, иако пратениците официјално се на одмор.
На 121. пленарна седница, закажана за 2 септември, на дневен ред се 53 точки. Меѓу нив се именување на вицегувернер на Народната банка, ратификации, Предлог-закон за пријавување и проверка на странски директни инвестиции, во прво читање, како и Предлог-националната стратегија за безбедност на сообраќајот на патиштата за периодот 2026–2030 година.
На дневен ред се и повеќе закони по скратена постапка, главно поврзани со усогласување со новиот Закон за високи раководители.
Редовната летна пауза во Собранието започнува на 1 август. Сепак, дел од пратениците и во текот на паузата имаат активности, вклучително и по повод одбележувањето на националниот празник Илинден на 2 август.