Еврокомесарката за проширување на Европската Унија, Марта Кос, заедно со министерката за образование и наука Весна Јаневска и првиот заменик-претседател на Владата и министер за европски прашања Беким Сали, денеска ќе го посетат Државниот студентски дом „Стив Наумов“ во Скопје, каде се реализира темелна реконструкција.
Министерката Јаневска на крајот на мај изврши увид во текот на градежните работи, при што најави дека од 1 октомври студентите ќе бидат сместени во обновените студентски домови „Стив Наумов“ и „Кузман Јосифовски-Питу“. Таа тогаш посочи и дека до септември се очекува да започне реконструкцијата и на останатите студентски домови во земјава.
За реконструкција и изградба на студентските домови се предвидени околу 50 милиони евра, од кои 10 милиони се грант-средства. Финансирањето е обезбедено преку заем од Германската развојна банка, додека грантот е преку Програмата за регионална енергетска ефикасност за Западен Балкан на Европската Унија.
Планирано е целосно обновување на девет државни студентски домови во Скопје, Прилеп, Битола, Штип и Охрид, а реконструкцијата ќе се спроведува во фази. Во првата фаза се опфатени домовите „Стив Наумов“ и „Кузман Јосифовски-Питу“ во Скопје, каде градежните активности ги изведува компанијата „Страбаг АГ“.
Еврокомесарката Марта Кос денеска е во Скопје на повеќе средби, меѓу кои со премиерот Христијан Мицкоски, претседателот на Собранието Африм Гаши и вицепремиерот Беким Сали. Предвидени се и разговори со претставници на граѓански организации и медиуми.