Подготовките за изградбата на брзата пруга на Коридор 10 се одвиваат според планираната динамика, информираше вицепремиерот и министер за транспорт Александар Николоски.
Тој најави дека во почетокот на август ќе се одржат јавни презентации на изработените студии за проектот во Скопје, Велес, Демир Капија и Гевгелија, каде граѓаните ќе можат да се запознаат со деталите и да дадат свои забелешки.
Според Николоски, завршени се студијата за влијание врз животната средина и студијата за социјалните аспекти, а по јавните презентации ќе следува нивна ревизија и вклучување на пристигнатите коментари.
Тој посочи дека до крајот на август треба да заврши оваа фаза, по што ќе започне подготовката на договорите за финансирање и за изведба на проектот.
Николоски повтори дека рокот за почеток на градежните активности останува крајот на годината, како што претходно најави и премиерот Христијан Мицкоски.
Во однос на финансирањето, министерот рече дека условите ќе бидат јавно претставени пред Собранието, согласно законските процедури, поради што засега не откри повеќе детали.