Во Скопје денеска ќе се одржи меѓународната научна конференција „When AI Betrays Law and Justice: Human Rights, Constitutionalism and Democratic Accountability in the Algorithmic Age“, посветена на влијанието на брзиот развој на вештачката интелигенција врз правото, човековите права и демократските процеси.
Организатор на конференцијата е Правниот факултет „Јустинијан Први“ при Универзитетот „Св. Кирил и Методиј“ во Скопје, во рамки на истражувачкиот проект „Усогласување на македонскиот правен систем со законодавството на Европската Унија за вештачка интелигенција“, поддржан од Министерството за образование и наука.
На едно место ќе се соберат меѓународни говорници, професори, правни експерти и практичари, кои ќе разговараат за предизвиците што вештачката интелигенција ги поставува пред човековите права, уставноста, владеењето на правото, регулативата и демократската одговорност.
Конференцијата ќе се одвива во два дела. Првиот ќе биде посветен на меѓународни предавања и експертски панели за вештачката интелигенција и нејзината поврзаност со човековите права, уставноста, регулацијата и демократската одговорност.
Вториот дел ќе се фокусира на состојбите во Северна Македонија, при што ќе бидат разгледани јавните ставови, практиките во корпоративниот сектор и институционалната подготвеност за примена и регулирање на вештачката интелигенција.
Во рамки на конференцијата ќе бидат презентирани и нови емпириски истражувања од Северна Македонија, со цел да се поттикне стручна и јавна дискусија за подготвеноста на институциите, компаниите и граѓаните за одговорно користење на технологијата.
Меѓу меѓународните говорници се Јудит Варга, основачки покровител на Central European Academy при Универзитетот во Мишколц, Лаура Каск, извршна директорка на естонската компанија Proud Engineers, Пол Немиц, поранешен главен советник за стратегии за дигитална транзиција во Европската комисија, и Макс Хубнер, визитинг професор по право на College of Europe и основач и извршен директор на The Change Lawyer.
На експертските панели ќе учествуваат професори и експерти од Правниот факултет „Јустинијан Први“, меѓу кои проф. д-р Лазар Јовевски, проф. д-р Александар Спасов и проф. д-р Бобан Мисоски.
Во делот посветен на Северна Македонија ќе бидат вклучени членови на истражувачкиот тим од Правниот факултет „Јустинијан Први“, како и надворешни експертски соработници. Меѓу нив е и Суад Сефери, претседател и основач на AI NOW Society, кој ќе зборува за подготвеноста за вештачка интелигенција во Северна Македонија и Западен Балкан.