Здравствените работници во јавното здравство во март годинава ќе добијат ново зголемување на платите, потврди денеска директорот на ФЗО, Сашко Клековски. Овојпат, зголемувањето нема да биде линеарно, туку процентуално, со цел соодветно да се вреднува трудот на лекарите.
„Во секторот здравство платите кумулативно веќе се зголемија за 17 отсто, а кај матичните доктори капитацијата порасна за историски 33 проценти. Во март следува нов раст. Овојпат фокусот ќе биде на лекарите, бидејќи со претходните линеарни зголемувања се намали разликата меѓу нив и помошниот кадар“, појасни Клековски.
Според него, платите на медицинските сестри веќе се конкурентни со приватниот сектор, а целта на државата е преку соодветно вреднување на трудот да го зачува квалитетниот кадар во јавните установи.