Агенцијата за храна и ветеринарство потврди присуство на западнонилски вирус кај мртов гавран пронајден во централното подрачје на Ресен, во паркот покрај Општината. Министерот за здравство Сашо Клековски оцени дека случајот е показател за локална циркулација на вирусот.
Клековски посочи дека гавранот е стационарна птица, односно не е преселница, поради што позитивниот наод укажува дека вирусот циркулира токму на тоа подрачје.
За случајот веднаш биле известени Центарот за јавно здравје Битола и градоначалникот на Ресен. Од нив се очекува ревизија на плановите за дезинсекција и преземање дополнителни мерки за прскање против комарци.
Според податоците на Министерството за здравство, засега нема регистриран човек заразен со западнонилска треска од Ресен.
Гавранот во Ресен е втората мртва птица кај која е потврден вирусот. Претходно позитивен резултат беше добиен и кај мртов гавран пронајден во централното подрачје на Скопје, покрај Вардар.
АХВ во меѓувреме го засили активниот надзор на целата територија на државата и спроведува лабораториско тестирање на примероци од живина и диви птици со цел да се следи ширењето на западнонилскиот вирус.