Денес до Министерот за внатрешни работи поднесовме писмена реакција за начинот на прибирање на величински броеви за новата полициска униформа.
Како синдикат целосно ја поздравуваме набавката на нова теренска униформа која треба да донесе современ изглед и практичност на чија потреба долги години укажувавме, но сметаме дека начинот на кој се реализира набавката во делот на прибирање на величински броеви ќе доведе до сериозен проблем, велаат од Независниот синдикат на полицијата.
Свесни сме дека според тендерската документација набавката треба да се реализира по 120 дена од прибирање на величинските броеви, но паушалното пишување на величини од страна на одговорните или телефонското консултирање за величините со цел истото да се реализира во неколку часа, без притоа да се предвиди можност истата физички да се погледне ќе доведе до сериозен проблем.
Новата униформа која доаѓа после искклучително долг период и која природно полициските службеници ќе имаат обврска да ја носат треба да биде соодветна по крој и величина, а не формално поделена, за што бараме предвидување на можност за корекција на величината откако истата физички ќе биде доставена и секој вработен ќе има можност да ја види, додаваат од Независниот синдикат.