Мистеријата за исчезнувањето на 15-годишно девојче од Милвоки доби разрешница по речиси четири години потрага.
Девојката, која исчезна во 2022 година, беше пронајдена во Вирџинија, на повеќе од 1.100 километри од нејзиниот дом, а според истражителите, таа била држена против нејзината волја и подложена на физичко и сексуално злоставување.
Триесет и седумгодишниот Овен Андерсон од Блексбург, Вирџинија, е обвинет пред Окружниот суд во Милвоки за три кривични дела, меѓу кои киднапирање со измама и киднапирање дете.
Девојката, која сега има 19 години, беше лоцирана откако полицијата реагирала на пријава за семејно насилство во мај 2026 година. Иако првично не го кажала вистинското име, таа подоцна ги контактирала властите и потврдила дека е лицето по кое со години се трага од Милвоки.
Според истрагата, девојчето излегло од дома на 23 јуни 2022 година, заминувајќи со превоз од Милвоки за Чикаго за да се сретне со Андерсон, со кого претходно комуницирала преку апликациите Kik, Discord и Signal. Тинејџерката навела дека бил применет притисок со уцени и ветувања, а на самиот ден на заминувањето ги користела инструкциите од обвинетиот.
Семејството на исчезнатата уште на самиот почеток реагираше со сомнеж дека станува збор за киднапирање, а во јавните апели изразија и незадоволство од првичната реакција на полициските органи.
„Нејзиниот татко ми се јави и ми рече: ‘Телефонот ѝ оди директно на говорна пошта’. Веднаш знаев дека нешто не е во ред“, рече лице блиско до семејството.
„Зошто полицијата не отиде да затропа на вратите на луѓето? Секој на таа улица има камери. Ние ги имавме снимките, а не полицијата“, рече еден член на семејството.
„Никој не ме слушаше, никој не седна со мене. Бевме против полициските станици, со стакло меѓу нас“, изјави друг член на семејството.
За време на четиригодишниот период во Блексбург, девојката била спречена да посетува училиште и и биле упатувани закани по нејзиниот и по животот на нејзиното семејство. При апсењето на Андерсон, кај него биле пронајдени два пиштола, 14 шаржери со муниција, ножеви и спрејови.
И покрај сомнежите во јавноста, полицијата исклучи можност дека се работи за организирана трговија со луѓе.
„Ве уверувам, немаме причина да веруваме дека таа била вмешана во трговија со луѓе“, изјави полицискиот службеник од Милвоки, Џејми Сромала.
Полицијата го повтори овој став и по пронаоѓањето на девојчето, нагласувајќи дека случајот се третира како поединечно киднапирање и злоупотреба.
Андерсон е обвинет кон крајот на јули 2026 година и моментално се наоѓа во притвор во Вирџинија, додека девојката е безбедно вратена кај своето семејство.