Гладувањето претставува исклучително поволен стил на живот кој делува како антиинфламација за организмот, смета интервентниот кардиолог и алпинист, д-р Сашко Кедев.
Во интервју за МИА, Кедев, кој неодамна беше одликуван од претседателката на државата за своите достигнувања во медицината и алпинизмот, сподели дека и самиот практикува ригорозен режим на исхрана каде клучот е во прескокнувањето на вечерата.
„Немам дефинитивна препорака за сите пациенти, меѓутоа сметам дека гладувањето е исклучително поволен стил на живот. Секој што може да гладува, колку подолго може да гладува, толку е подобро, бидејќи гладувањето е антиинфламација. Гладувањето намалува внес на калории и на некој начин овозможува да се прочистува организмот, но се прочистува и умот на некој начин“, вели д-р Кедев.
Според него, наједноставниот механизам за постигнување на овој ефект е последниот оброк да заврши во 16 или 17 часот попладне и до следното утро да се консумира само вода.
„Тоа е најверојатно најкорисното нешто. Овие механизми се опишани уште во древните цивилизации. Тибетанската медицина, која што е постара од кинеската, го опишува сето тоа. Во многу религии, во христијанството ние имаме пост, но тој пост треба да е многу ригорозен, проследен со намалување на телесната тежина. Тогаш е вистинскиот бенефит“, појаснува докторот.
Кедев, кој го комплетираше искачувањето на сите 14 светски врвови повисоки од 8.000 метри, нагласува дека гладувањето доведува до поголема ментална дисциплина, без разлика дали лицето е религиозно или атеист.