Бројот на загинати во инцидентот што се случи за време на воена вежба во Каспиското Море се зголеми на 14, откако спасувачките екипи утрово ги пронајдоа телата на уште двајца војници, соопшти денеска Министерството за одбрана на Казахстан.
Со ова, по пронаоѓањето на последните тела изутринава, Министерството објави дека на Телеграм соопштило за завршување на операциите за пребарување и спасување.
— Раководството и припадниците на Министерството за одбрана и на Вооружените сили на Република Казахстан упатуваат најдлабоко и најискрено сочувство до семејствата и блиските на загинатите припадници на вооружените сили. Семејствата на загинатите ќе ја добијат сета неопходна сеопфатна, финансиска и психолошка поддршка, се наведува во соопштението.
Инцидентот се случи во четвртокот во југозападниот регион Мангистау, кога 17 припадници на вооружените сили беа однесени од морските бранови додека извршувале задачи во рамки на борбена обука. Првично беше потврдена смртта на деветмина војници.
Според Министерството за одбрана, несреќата се случила поради нагло влошување на временските услови и засилување на ветерот. На местото на настанот итно беше упатена комисија предводена од министерот за одбрана Даурен Косанов за да ги утврди точно сите околности.
Подоцна истиот ден, казахстанскиот претседател Касим-Жомарт Токаев потпиша указ со кој 25 септември го прогласи за Ден на национална жалост во земјата.