Турските истражни органи проверуваат дали наводно каснување од мајмун е поврзано со смртта на познатата актерка Еџе Иртем (35), која почина непосредно по нејзиното враќање од одмор во Тајланд.
Како што пренесуваат тамошните медиуми, семејството на актерката побарало овој детаљ итно да биде земен предвид при обдукциските анализи. Мајката на Еџе посочила дека нејзината ќерка имала сериозни стомачни тегоби уште за време на патувањето, а на денот на нејзиниот роденден состојбата дополнително се влошила.
Правните застапници веќе поднеле документација до обвинителството во Истанбул, нотирајќи видливи траги на нејзината рака.
„Во текот на разговорот со експертите, дознавме дека каснувањето од мајмун може да доведе до смртоносни последици, вклучително и сепса, односно труење на крвта“, изјавил адвокатот Угур Гокојун.
Сепак, стручната јавност во Турција повикува на смиреност и трпение додека трае истрагата. Вештакот за заразни болести Мехмет Џејхан појасни дека иако овие животни пренесуваат опасни вируси и бактерии, ваквите фатални последици се исклучително ретки во праксата и дека фокусот треба да се стави на евентуални скриени срцеви аномалии.
Надлежните институции апелираа до јавноста на социјалните мрежи да не се шират непроверени теории и да се почекаат официјалните медицински наоди кои треба точно да утврдат што ја предизвикало смртта на младата актерка.