Централното собрание на Движењето Беса вечерва во Тетово донесе одлука за сопствено распуштање, со цел да се отвори патот за целосно спојување на партиите од коалицијата ВЛЕН во еден политички субјект. Лидерот на партијата, Билал Касами, по седницата истакна дека овој чекор е во насока на структурирање на ВЛЕН врз основа на веќе воспоставениот мораториум за индивидуални партиски активности.
Касами доби овластување да ги продолжи разговорите за обединувањето, притоа нагласувајќи дека новиот субјект ќе се води според принципот на правда и волјата на гласачите, објави 4news.mk На прашањето дали тој ќе застане на чело на новата заедничка партија, Касами одговори дека е подготвен да преземе каква било обврска доколку тоа биде заедничка проценка.
На состанокот била анализирана и работата на досегашните владини функционери од редовите на Беса. Касами посочи дека постои капацитет за многу повеќе работа од она што е сработено досега, најавувајќи дека наодите од анализите ќе бидат земени предвид при претстојната реконструкција на Владата.
Во однос на изјавата на премиерот Христијан Мицкоски дека мандатарот е тој што ја составува Владата, Касами потврди дека се свесни за процедурите, но беше дециден за партиското влијание во коалицијата.
„Сè додека е политичка влада во која учествува Беса, како дел од ВЛЕН, Беса одлучува кој министер ќе биде предложен од нејзина страна“, изјави Касами.
Процесот на евалуација го опфаќа и министерот Фатмир Лимани, кој пред седницата истакна дека за неговата позиција ќе пресудат реализираните проекти и сработеното во изминатите 16-17 месеци. Лимани порача дека е потребна разумност и зачувување на структурата на ВЛЕН, предупредувајќи дека секое нарушување на единството би значело враќање назад и отворање простор за други политички структури во извршната власт.