Претседателот на шпанската покраина Валенсија, Карлос Мазон, поднесе оставка по силниот јавен и политички притисок поради справувањето на неговата влада со катастрофалните поплави во 2024 година, кои однесоа 229 животи.
Мазон, член на Народната партија (PP), со месеци одбиваше да се повлече, и покрај јавните критики поради тоа што во моментите кога регионот беше погоден од поројни дождови, тој поминал повеќе од три часа на ручек со новинарка.
„Не можам повеќе да продолжам“, изјави Мазон во понеделникот, најавувајќи ја оставката, но не прецизираше дали ќе го напушти и своето пратеничко место во регионалниот парламент, што би значело губење на имунитетот.
Масовни протести и критики
Одбивањето на Мазон да си замине предизвика масовни протести во Валенсија под слоганот:
„Кал на нашите раце, крв на неговите“. Според анкети, 75% од граѓаните сметале дека тој треба да си замине.
Мазон тврдеше дека „ниедна влада во светот нема алатки за да спречи вакви поројни дождови“, но администрацијата беше критикувана за доцнењето на алармот, кој бил испратен на мобилните телефони на граѓаните дури по 20 часот, кога многу жртви веќе загинале.
Парламентарна истрага и судска постапка се во тек за утврдување на евентуална кривична одговорност поради небрежност.
Новинарката Марибел Вилаплана, со која Мазон ручал, потврди дека средбата траела од 15:00 до 18:45, додавајќи дека „не била свесна за тежината на ситуацијата“.
Судијката Нурија Руис Тобарра, која ја води истрагата, го опиша настанот како:
„Дантевска епизода – вистински пекол од уништување и смрт. Постои очигледно доцнење во активирањето на кризен штаб и испраќањето на предупредувања до населението.“
Дополнителни скандали
Скандал предизвика и информацијата дека потпретседателката на Валенсија, Сусана Камареро, ја напуштила седницата на кризното тело за да присуствува на церемонија за доделување награди, додека регионот бил погоден од најтешката природна катастрофа во својата историја.
Мазон засега не најавил дали ќе бидат распишани предвремени регионални избори, но аналитичарите оценуваат дека неговата оставка го означува крајот на политичката кариера на еден од најистакнатите членови на Народната партија во источна Шпанија.