Во екот на сезоната на годишни одмори, кога многумина патуваат и ги оставаат своите домови празни, расте и ризикот од провали. Затоа е важно навреме да се преземат мерки за заштита, за станот или куќата да бидат безбедни за време на отсуството.
Како граѓаните можат да ја заштитат својата имотна безбедност и без грижа да заминат на одмор, за емисијата „Редакција“ зборуваше Исиодора Милосављевиќ, генерален секретар на „Друштво за Безбедност” од Србија.
– Многу е важно да се спроведат превентивни мерки за да не станеме мета на провалници додека сме отсутни. Постојат неколку едноставни совети кои можат значително да го намалат ризикот од провала. Најдобро е клучот од станот или куќата да се остави на лице од доверба, кое повремено ќе доаѓа, ќе ги отвора прозорците, ќе го вклучува телевизорот, ќе ја вади поштата и ќе го празни сандачето. На тој начин се остава впечаток дека некој престојува во домот, што може да ги одврати провалниците и да ја намали можноста објектот да биде „таргетиран“ – изјави Милосављевиќ.
Таа додава дека една од најчестите грешки е спуштањето на ролетните и оставањето на домот во таква состојба во текот на целиот одмор, бидејќи тоа јасно укажува дека во објектот нема никој. Како ефикасна заштита ги посочи и видеонадзорот и алармните системи, кои иако бараат поголема инвестиција, значително ја зголемуваат безбедноста и делуваат одвраќачки за провалниците.
Милосављевиќ предупреди и на ризикот од несоодветно користење на социјалните мрежи за време на одмор.
– Она што несвесно го правиме, а може да привлече крадци, се социјалните мрежи. Провалниците често ги следат објавите, па споделување фотографии од одмор или означување локација јасно покажува дека не сте дома. Затоа се препорачува фотографиите да се објавуваат по враќањето од патувањето, со цел да се намали ризикот од злоупотреба на информациите – заклучи Милосављевиќ за емисијата „Редакција“.