Собранието го избра Борче Серафимовски за нов министер за земјоделство, шумарство и водостопанство, како кадар на Движењето ЗНАМ, во рамки на реконструкцијата на Владата.
Серафимовски до изборот на министерската функција ја извршуваше позицијата државен секретар во Министерството за земјоделство, шумарство и водостопанство.
Тој е дипломиран дефендолог на Институтот за одбранбени и мировни студии при Филозофскиот факултет на Универзитетот „Св. Кирил и Методиј“ во Скопје, а има диплома и за бизнис менаџмент од Варненскиот слободен универзитет „Черноризец Храбар“ во Варна, Бугарија.
Серафимовски е магистер по меѓународни односи на Југозападниот универзитет „Неофит Рилски“ во Благоевград, Бугарија, а е и докторант по организациски науки на Великотрновскиот универзитет „Св. Св. Кирил и Методиј“ во Велико Трново.
Во својата професионална кариера, покрај функцијата државен секретар, бил и генерален директор и заменик-претседател на Управниот одбор на Меѓународниот славјански универзитет „Свети Николе“.
Според неговата биографија, Серафимовски зборува англиски, руски и бугарски јазик.