На 5-ти декември 2025 година, во Амбасадата на Јапонија, Н.Е. Сецуко Кавахара, Амбасадорка на Јапонија во Република Северна Македонија, го потпиша вториот грант договор за 2025 г. во рамки на GGP грант програма за мали проекти за човекова безбедност во Република Северна Македонија, чија цел е подобрување на основните човекови потреби.
Свеченото потпишување на грант договорот беше отворено од Амбасадорката на Јапонија, Н.Е. Сецуко КАВАХАРА. „Проектот за обезбедување на возило за управување со отпад за Општина Чучер Сандево“ во вредност од 75,254 евра, ќе придонесе за зајакнување на капацитетот за собирање отпад во областа, со што ќе придонесе за подобрување на животната средина за локалните жители.
По потпишувањето на договорот за грант, краток говор одржа добитникот на грантот, г. Зоран Бајовски, градоначалник на општина Чучер Сандево. Од 1996 година до денес, преку GGP програмата, Јапонија има обезбедено грант помош во 59 општини преку проекти за реновирање и обезбедување на опрема и возила за повеќе од 77 училишта и градинки, 73 здравствени установи и има обезбедено 37 возила (амбулантни возила, противпожарни возила и возила за одржување и управување со отпад), во износ повеќе од 9,5 милиони евра.