Образованието и науката се клучен двигател на развојот на државата, порача министерката за образование и наука Весна Јаневска на денешната прес-конференција во Владата, на која презентираше отчет за сработеното во изминатите две години.
Таа истакна дека во изминатиот период се реализирани низа реформи насочени кон унапредување на условите во основното, средното и високото образование, како и во научно-истражувачката дејност, со цел подобрување на квалитетот и зголемување на можностите за учениците, студентите и наставниот кадар.
Јаневска оцени дека при преземањето на функцијата бил затекнат сериозен пад во системот, но дека со, како што рече, одговорни политики е започнат процес на стабилизација и унапредување на образованието и науката.
Таа посочи дека е воспоставена системска поддршка за талентирани ученици, при што се покриваат трошоците за учество на меѓународни олимпијади, а во подготовка е и концепт за нивна системска детекција и поддршка.
Во делот на стручното образование, информираше дека е унапреден моделот на дуално образование со вклучени околу 1.000 компании, како и дека се формирани седум регионални центри, со најави за отворање на осми.
Според неа, воведено е и кариерно советување во основното и средното образование, со цел полесно насочување на учениците кон нивниот понатамошен образовен и професионален пат.
Јаневска истакна дека за првпат по подолг период учебниците се обезбедуваат навреме, пред почетокот на учебната година, вклучително и учебници по странски јазици.
Посебен акцент беше ставен на поддршката за учениците со попреченост, при што, како што наведе, значително е зголемен бројот на образовни асистенти, а воведени се и нови форми на хибридно образование за ученици кои се на подолго лекување.
Во делот на студентскиот стандард, министерката информираше за проширување на опфатот на субвенциониран студентски оброк, олеснети услови за стипендии и воведување нови категории стипендии, меѓу кои и за студенти со ретки болести и посебни образовни потреби.
Таа најави и нов Закон за високо образование, со кој најдобрите студенти ќе имаат предност при вработување во јавните високообразовни и научни институции.
Во делот на инфраструктурата, посочи дека се инвестирани околу 70 милиони евра во повеќе од 90 проекти, при што се градат и реконструираат училишта, спортски сали и студентски домови, а дел од капацитетите наскоро повторно ќе бидат ставени во функција.
Јаневска информираше и за дигитализацијата во образованието, наведувајќи дека во училиштата е воведена нова ИТ опрема, безбеден интернет и обуки за наставници за користење на нови технологии, вклучително и вештачка интелигенција.
Таа се осврна и на оптимизацијата на училишната мрежа, нагласувајќи дека, и покрај реакциите, нема да има отпуштања, туку прилагодување на системот на демографските промени.
Во делот на платите на наставниците, истакна дека е договорено нивно постепено зголемување во наредните години, како и унапредување на кариерниот развој и намалување на административните обврски преку дигитални системи.
Јаневска заклучи дека вложувањата во образованието и науката се значително зголемени, како во делот на буџетите за универзитетите, така и за научно-истражувачки проекти и пристап до меѓународни бази на податоци.