Министерката за образование и наука, Весна Јаневска, денеска од Битола порача дека новото законско решение за високото образование е клучниот чекор кон стабилизација и успех на академскиот сектор. На јавната дебата одржана на Универзитетот „Св. Климент Охридски“ (УКЛО), таа истакна дека секој аргументиран предлог од академската заедница ќе биде вграден во финалниот текст.
Јаневска децидно ги демантираше гласините дека државата ќе се меша во студиските програми. Автономијата останува недопрена, но се воведува поголема отчетност.
Се воведуваат појасни правила за бројот на научни трудови објавени во меѓународни бази.
За првпат се нуди нов модел на финансирање – универзитетите кои ќе покажат успех, ќе добијат дополнителни буџетски средства.
„Овој закон е голем и во овој момент пререгулиран, но тоа е неопходно за да го стабилизираме системот. По неколку години, сите ќе се уверат во неговиот успех“, порача министерката.