Министерката за образование и наука, Весна Јаневска, обелодени сериозни нерегуларности поврзани со издавањето дипломи на Славјанскиот универзитет. Според нејзините информации, веќе се поништени две дипломи, а откриените пропусти во образовниот процес се фрапантни.
Јаневска посочи дека биле евидентирани случаи каде студенти полагале по 14 или 17 испити во само една сесија. Дополнително, утврдени се несоодветни еквиваленции на ЕКТ-кредити, каде од еден предмет се признавале повеќе различни кредити за да се стигне до потребната бројка за дипломирање.
Еден од најневеројатните детали е диплома од 2016 година, на која стои печат со името „Република Северна Македонија“, иако уставните измени за името се случија две години подоцна.
„Вие знаете дека тогаш ние го имавме нашето омилено име. Името е променето во 2018 година“, вели Јаневска.
Министерката најави дека институциите ќе постапат строго доколку се потврдат сомнежите за фалсификување на документацијата.
„Доколку се докаже, а сигурно ќе се докаже фалсификатот, универзитетот ќе има сериозни последици“, изјави Јаневска одговарајќи на новинарско прашање пред последната панел-дискусија во рамките на кампањата „Магијата е во знаењето“.