Министерката за образование и наука, проф. д-р Весна Јаневска, се обрати на отворањето на 17-тата меѓународна конференција на тема „Безбедност 2030: Ера на паметни технологии, отпорни општества – ризици и предизвици“, во организација на Факултетот за безбедност при Универзитетот „Св. Климент Охридски“. Таа истакна дека за заштита на децата и целосната сигурност неопходни се меѓународна соработка, силно меѓуинституционално делување и јавно-приватно партнерство за развој на системи со вградена безбедност.
Говорејќи за новите предизвици кои ги носи дигиталната трансформација, министерката нагласи:
„Како што чекориме кон иднината, границата помеѓу физичкиот и дигиталниот свет, речиси целосно исчезнува. Вештачката интелигенција и паметните мрежи стануваат ткиво на нашите градови, економии, образование, здравство и инфраструктура. Оваа трансформација носи огромни можности, но и поголеми предизвици – проширени сајбер закани, дезинформации и заштита на приватност.“
Јаневска подвлече дека Министерството за образование и наука може ефикасно да ги заштити младите само преку координиран пристап со МВР, Министерството за дигитална трансформација и академската заедница.
Таа информираше дека МОН активно работи на јакнење на системот за создавање безбедносни кадри преку возобновување на средното полициско училиште, модернизација на студиските програми и финансирање на научно-истражувачки проекти од национален интерес. На настанот, покрај експертската фела, воведни обраќања имаа и министерот за внатрешни работи Панче Тошковски и деканот на Факултетот за безбедност, проф. д-р Јонче Ивановски.