Министерката за образование и наука Весна Јаневска ги отфрли наводите дека ќе има намалување на студентските стипендии и ги оцени како манипулација обвинувањата на СДСМ, нагласувајќи дека Владата работи на унапредување на студентскиот стандард и подобра распределба на средствата. Таа појасни дека со предложените измени на Законот за студентски стандард се предвидува подобро прераспределување во рамките на квотата со цел стипендиите да се базираат на успех, на потребите на државата и на пазарот на трудот.
Министерката уверува дека бројките не се фиксни и дека досегашниот модел оставал неискористени средства во одредени групи.
„Да се прејудицира уште од сега дека се намалени стипендиите е чиста манипулација на политичката партија СДСМ, бидејќи бројот на стипендии не е уреден со законско решение, туку се одлучува на годишно ниво, согласно Буџетот и согласно потребите на државата… Во последните пет години, квотата за социјални стипендии не се исполнува, односно истите не се доделуваат во бројот кој е предвиден. Тоа е позитивна статистика и не вреди да се напаѓа, имајќи предвид дека станува збор за „социјална категорија на граѓани“. Од друга страна пак, кога квотата од една група не се исполнува, таа не може да се пренесе во друга група и заради тоа остануваа недоделени стипендии“, наведува таа.
Јаневска ги демантираше и тврдењата дека ќе поскапи сместувањето во студентските домови, најавувајќи ново законско решение со кое платите на вработените во домовите ќе бидат преземени од државата за да се намали товарот врз партиципацијата. Таа најави и дека ова лето започнува комплетна реконструкција на сите студентски домови во земјата.
Реакцијата на министерката уследи откако СДСМ денеска јавно обвини дека со предложените измени на Законот за студентски стандард се прават негативни промени за студентите. Според опозициската партија, измените значат кратење на дел од стипендиите, особено за студентите од социјално загрозени категории, како и можни повисоки трошоци за сместување во студентските домови.