Министерката за образование и наука, Весна Јаневска, денеска јасно стави до знаење дека новиот закон за високо образование наскоро ќе влезе во владина процедура. И покрај барањата на одредена група професори за негово повлекување и доработка, Јаневска порача дека едногодишниот труд на работната група нема да биде поништен.
Според неа, отпорот кај дел од академската заедница доаѓа од страв за исполнување на новите, повисоки критериуми.
Министерката директно им одговори на критичарите, посочувајќи дека законот нуди флексибилност, но не и отстапки од квалитетот.
„Мала група професори бараат повлекување на законот. Претпоставувам дека тоа е од страв дека во иднина нема да можат да ги исполнат условите кои законот ги бара. Имаат две можности. Првата можност им е сериозно да се фатат за работа. Втората можност е да останат во истото звање подолго време, па потоа, кога ќе бидат спремни, да одат во следното звање. Од тука ништо не губат“, изјави Јаневска.
Главната цел на овие законски измени е подобрување на рејтингот на македонските универзитети и нивно позиционирање на престижната Шангајска листа. Министерката нагласи дека сите конструктивни забелешки се веќе вметнати во финалниот текст.