Силна експлозија на гас се случи во населбата Флоридсдорф во Виена во неделата вечерта, при што целосно беше уништен семеен дом. Се сомнева дека експлозијата е намерно предизвикана од 93-годишен жител, кој бил извлечен од урнатините од страна на спасувачите, а потоа уапсен, пишува австриски „Хојте“.
Уште осум лица се повредени, а две морале да бидат хоспитализирани – 45-годишен маж и бремена жена, за која се наведува дека паднала на стомак. Лекарите од итната помош им укажале помош на шест жители на самото место, по што биле пуштени на домашно лекување.
Експлозијата се случила кратко по полноќ на Карл-Бенц-Вег. По силната детонација, од семејниот дом останале само урнатини. Виенските пожарникари веднаш интервенирале со 90 пожарникари и 22 возила.
Урнатините биле пребарувани со кучиња-трагачи од противпожарната служба во Виена. Едно од кучињата набрзо реагирало, што подоцна било потврдено и од други кучиња. Тимот за спасување при катастрофи потоа користел звучна опрема и камера за да го лоцира повредениот и да воспостави контакт со него.
За да го извлечат, спасувачите морале рачно да отстрануваат делови од урнатините. По извлекувањето, мажот бил предаден на виенската служба за итна помош и префрлен во болница, каде што е под лекарски надзор.
Истрагата за причините за експлозијата е во тек, соопштуваат надлежните.
„Тој живееше сам, но неговиот посинок сакал да го исфрли од куќата и да го смести во дом“, изјави за „Хојте“ лице блиско до 93-годишникот.