Општина Тетово сè уште не ги исплати ветените по 100 евра за првачињата, иако според одлуката на Советот, парите требаше да бидат распределени уште на почетокот на јули.
Советот на Општина Тетово на почетокот на јуни донесе одлука со која за секое дете запишано во прво одделение во учебната 2026/2027 година требаше да се додели ваучер од 6.150 денари. Мерката важеше за учениците запишани до 20 јуни.
Градоначалникот Билал Касами сега вели дека исплатата не била реализирана бидејќи Општината е блокирана поради долгови, а парите што пристигнуваат во општинската каса се насочуваат кон извршители.
Според Касами, Општината испратила налози за исплата на средствата за првачињата, но Трезорот не ги реализирал поради блокадата. Тој најави дека се работи на деблокирање на сметката и дека исплатата за првачињата ќе биде меѓу приоритетите.
На истата седница на која беше донесена одлуката за субвенционирање на првачињата, Советот одобрил и еднократна финансиска помош од 1.144.484 денари, односно околу 18.000 евра, за Исламската верска заедница – Муфтиство Тетово. Средствата биле одобрени по барање да се врати износот платен како данок на промет при купување недвижен имот во комплексот Арабати Баба Теќе.