Вкупно 31 пожар на отворен простор се регистрирани утринава до 7:30 часот на територијата на државата. Според информациите од Центарот за управување со кризи (ЦУК), четири пожари се сè уште активни, три се ставени под контрола, додека 24 се целосно изгаснати.
Активните жаришта се лоцирани во повеќе региони:
- Студеничани и Зелениково: Пожарот ги опфаќа селата Моране, Вртекица, Рамни Габер и кракот кон Палиград, како и теренот над селата Вражале и Тисовица, каде гори мешана шума.
- Гостивар и Македонски Брод: Зафатена е нискостеблеста шума, ниска вегетација, пасишта и папрат во с. Трново (Гостивар), со ширење кон селата Битово, Заград и Страјане (Македонски Брод).
- Чашка: Над селото Нежилово, на местото викано Сватови, гори ниска вегетација и смреки.
- Струга: Во селото Франгово гори нискостеблеста шума и ниска вегетација.
Под контрола на противпожарните екипи се три пожари:
- Општина Кичево – с. Тајмиште (м.в. Дарда), каде е зафатена високостеблеста букова шума;
- Општина Делчево – пожар на депонија;
- Општина Брвеница – село Стрмница.
Во изминатиот период целосно се ликвидирани 24 пожари на отворено, меѓу кои во општините Желино, Теарце, Кичево, Делчево, Градско, Гостивар, Росоман, Босилово, Арачиново, Карпош, Гази Баба, Струмица, Кавадарци, Берово, Куманово, Шуто Оризари и Битола. Меѓу покрупните интервенции беше и изгаснувањето на пожарот помеѓу резерватот „Јасен“ и селото Брезница во Македонски Брод.