Во Италија годинава се регистрирани 432 случаи на западнонилска треска, а 17 лица починале, покажуваат податоците на Италијанскиот институт за јавно здравје заклучно со 26 август. Само во последната недела биле потврдени уште 80 нови случаи.
Кај 223 заболени вирусот предизвикал невроинвазивна форма на болеста, односно бил зафатен централниот нервен систем. Кај овие пациенти се појавиле сериозни состојби како менингитис и енцефалитис.
Според објавените податоци, смртноста меѓу регистрираните случаи изнесува 7,2 проценти, што е пониско ниво во споредба со истиот период минатата година.
Западнонилскиот вирус најчесто се пренесува преку убод од заразен комарец. Кај голем дел од заразените инфекцијата поминува без симптоми или со лесна клиничка слика, но кај дел од пациентите може да предизвика тешки невролошки компликации.