Во Собранието за денеска е закажана динамична агенда со седници на три матични комисии, на кои ќе се разгледуваат неколку значајни законски решенија.
Пред пратениците од Комисијата за економски прашања, труд и енергетска политика ќе се најдат Предлог-законот за младински додаток, како и измените на Законот за индустриски-зелени зони, двата во прво читање.
Истовремено, Комисијата за образование, наука и спорт ќе расправа за проширување на високообразовната дејност во државата.
„На дневен ред на Комисијата за образование, наука и спорт е Предлог на закон за основање на Факултет за медицински науки и здравство во состав на Универзитетот ’Св. Климент Охридски’ – Битола, во прво читање“, информираат од Собранието.
Законодавно-правната комисија, пак, ќе има обемна работа со разгледување на неколку предлози, меѓу кои и измените на Законот за придонеси од задолжително социјално осигурување, младинскиот додаток и регулативата за зелените индустриски зони.
Сите законски предлози се во почетна фаза на разгледување, по што ќе продолжи собраниската процедура за нивно конечно усвојување.