Министерката за образование и наука, Весна Јаневска, денеска се огласи за случајот со нерегуларностите при упис на магистерски и докторски студии на Филозофскиот факултет при УКИМ. Јаневска потенцираше дека таа лично не е надлежна да одредува кој ќе сноси одговорност, туку тоа е работа на други институции во државата.
„Би сакала да верувам дека ова е изолиран случај и дека не е тенденциозно направен, но токму поради тоа другите институции ќе си го кажат зборот“, изјави Јаневска.
Таа додаде дека доколку се утврди дека уписот на студентите бил нерегуларен, следниот логичен чекор е и поништување на дипломите, но конечната одлука ќе биде донесена по завршувањето на извештаите од надлежните органи.
Потсетуваме, раководството на Филозофскиот факултет веќе презеде мерки по заклучоците на Државниот просветен инспекторат (ДПИ). Деканот, проф. д-р Оливер Бакрески, соопшти дека е поништен уписот и статусот на студенти за седум магистранти и четворица докторанти. Проблемот настанал бидејќи тие студенти имале тригодишни стручни (апликативни) додипломски студии, кои според законот од 2018 година, не овозможуваат продолжување на вториот и третиот циклус студии, за разлика од академските студии.
Од факултетот појаснија дека се спроведуваат заклучоците на Инспекторатот, но останува неизвесноста околу судбината на дипломите на оние кои веќе ги завршиле студиите пред овој надзор.