Германскиот канцелар Фридрих Мерц и неговата делегација доживеаја сообраќаен инцидент на патот кон аеродромот во Ријад, кога на еден од минибусите му пукна гума. Иако возилото сериозно се оштетило, благодарение на присебноста на возачот, никој не е повреден и е избегнат судир со други возила.
Инцидентот се случил на помалку од три километри пред аеродромот во саудиската престолнина. Додека членовите на делегацијата чекаа превоз, канцеларот Мерц ги чекаше своите соработници во владиниот „Ербас“, по што патувањето продолжи со минимално задоцнување од 15 минути.
„Во време на глобални економски превирања, Германија и Катар свесно се потпираат на дијалог и инвестиции во иднината“, изјави Мерц по пристигнувањето во Доха, каде беше пречекан од катарскиот премиер.
Целта на оваа тридневна турнеја на канцеларот низ Саудиска Арабија, ОАЕ и Катар е зајакнување на економските врски и изнаоѓање нови стратешки партнери за германската индустрија.