Туристите кои престојуваат во познатото летувалиште Пефкохори на Халкидики добија предупредување да не се капат во дел од морето кај плажата Акротири.
Локалните власти воведоа привремена забрана за користење на овој дел од брегот поради истекување на отпадни води, предизвикано од пукнат канализациски цевковод.
Одлуката ја донесе Општина Касандра како превентивна мерка за заштита на јавното здравје. Забраната опфаќа крајбрежен појас во должина од 200 метри од двете страни на местото каде што се случило излевањето.
Според информациите од грчките медиуми, општинските служби веднаш интервенирале на теренот, го санирале дефектот и го запреле понатамошното истекување во областа „Акротири“, по што следувало чистење и дезинфекција.
Иако дефектот е целосно отстранет, забраната за капење ќе остане во сила сè додека не пристигнат официјалните резултати од лабораториските анализи на морската вода.
Локалните власти нагласуваат дека ограничувањето не се однесува на целото туристичко место Пефкохори, туку исклучиво на јасно обележаниот појас кај плажата Акротири.
На туристите и жителите им се препорачува строго да ја почитуваат забраната сè до нејзиното официјално укинување.
За инцидентот веќе се известени Дирекцијата за јавно здравје и Центарот за заштита и унапредување на животната средина на Халкидики, кои ја следат состојбата.