ИК на ВМРО-ДПМНЕ: На изборите кои се одржаа во недемократска атмосфера ВМРО-ДПМНЕ ја доби довербата од народот во најголем број на општини

ВМРО-ДПМНЕ ја одржа својата редовна седница на Извршниот Комитет прва по одржувањето на предвремените парламентарни избори. На седницата се дискутираше за актуелната општествено политичка состојба и последните избори кои се реализираа.

Како што соопштуваат од партијата, Извршниот Комитет заклучил дека изборите се одржаа во недемократска атмосфера со масовен поткуп на гласови спроведен од актуелната власт на СДСМ.

-Воедно ВМРО-ДПМНЕ забележува и на бројните недостатоци на денот на изборите срочени во приговорите до Државната Изборна Комисија кои беа одбиени, а кои ќе се преточат во тужбено барање до Управниот Суд. Во едни вакви околности ВМРО-ДПМНЕ ја доби довербата од народот во најголем број на општини, и воедно издејствува поголем број на мандати споредено со партијата СДСМ без коалицијата со БЕСА. Воедно Извршниот Комитет на ВМРО-ДПМНЕ даде насока да се изготви темелна анализа за резултатите од изборите за која подоцна ќе се дискутира на органите и телата на партијата, се вели во соопштението од партијата.

Извршниот Комитет на ВМРО-ДПМНЕ го овластил претседателот Христијан Мицкоски да продолжи со разговори во обидот за составување на ново парламентарно мнозинство.

-ВМРО-ДПМНЕ смета дека загрижува економската криза  во државата која секој ден е се полоша и за која треба активни мерки кои истата да се надмине, велат од партијата.